Ijara shartnomasi va davriy to‘lovlarni telefonda yuritish

Shartnomada nimalar yoziladi

Shartnoma mijoz kartasidan ochiladi. Siz ijara obyekti nomini (nima ijaraga berilayotganini), ijara summasini va valyutani, boshlanish sanasini hamda davrni kiritasiz: kunlik, haftalik, oylik yoki yillik. Boshlanish sanasi bugun yoki kelajakdagi kun bo‘lishi kerak. Davrlar soni aniq bo‘lsa, «Qancha muddatga?» maydoniga yozasiz; noaniq bo‘lsa, «Muddatsiz» ni yoqasiz.

Hujjat ID avtomatik yaratiladi, keyin «Hujjat IDni tahrirlash» orqali o‘zgartirish mumkin; bitta do‘konda ikki shartnoma bir xil ID ola olmaydi. Shartnomaga rasm yoki PDF fayl biriktirasiz — masalan, qo‘lda imzolangan bitim nusxasi. Eslatma vaqtini ham shu yerda tanlaysiz: davr boshida yoki davr oxirida.

• Ijara obyekti nomi, ijara summasi, valyuta
• Davr: kunlik, haftalik, oylik, yillik; muddatli yoki muddatsiz
• Rasm yoki PDF biriktirish, avtomatik hujjat ID

Davriy to‘lovlar va eslatmalar

Shartnoma saqlangach, har bir davr uchun to‘lov qatori hosil bo‘ladi. Mijoz to‘laganda «To‘lov +» orqali summa, sana, to‘lov usuli (naqd, karta, o‘tkazma) va izoh yozasiz. «Ijara tafsilotlari» sahifasida jami to‘langan summa va to‘lovlar tarixi ko‘rinadi. Mijozning barcha shartnomalari mijoz kartasida ro‘yxat bo‘lib turadi va holati bo‘yicha tartiblanadi.

Har bir davr uchun mijozga «Ijara muddati» shablonidagi SMS eslatma rejalashtiriladi. U do‘konda sozlangan SMS vaqtida ketadi, siz tanlagan bo‘yicha davr boshida yoki oxirida. To‘langan davr uchun eslatma yuborilmaydi; mijoz SMS olishni o‘chirgan bo‘lsa ham yuborilmaydi. Mijoz Telegram’ga ulangan bo‘lsa, xabar u yerga ham boradi. Shartnoma egasiga esa muddati kelgan va to‘lanmagan davr haqida har kuni ertalab soat 09:00 da push bildirishnoma keladi.

Qaytarish va yakuniy hisob

Mijoz narsani qaytarganda «Qaytarib olish» ni bosib, qaytarilgan sanani kiritasiz. Ilova boshlanish sanasidan qaytarilgan kungacha nechta davr o‘tganini hisoblaydi va yakuniy summani chiqaradi. Qoida oddiy: qaytarilgan kun ham qo‘shiladi, har bir boshlangan davr to‘liq hisoblanadi. Masalan, oylik ijara 1-sanada boshlanib, 3-sanada qaytarilsa, bir oy hisoblanadi; keyingi oyning 2-sanasida qaytarilsa — ikki oy.

Shu tariqa muddatsiz shartnoma ham aniq yopiladi: «Jami hisoblangan» summa va to‘langan summa yonma-yon turadi, farq mijozning qoldig‘i bo‘ladi. Shartnoma «Yakunlangan» holatiga o‘tadi va undan keyin eslatmalar ketmaydi.

Bekor qilish

Shartnoma noto‘g‘ri ochilgan yoki mijoz fikridan qaytgan bo‘lsa, «Bekor qilish» ni tanlab, ixtiyoriy sabab yozasiz. To‘lovlar tarixi saqlanadi, lekin keyingi to‘lovlar va eslatmalar to‘xtatiladi. Shartnoma ro‘yxatda «Bekor qilingan» belgisi bilan qoladi, shuning uchun hisob-kitob izsiz yo‘qolmaydi. Ijara moduli mobil ilovada ishlaydi; tarifga qarab faol shartnomalar soniga limit bo‘lishi mumkin, aniq shartlar tariflar sahifasida.

Ko‘p so‘raladigan savollar